Online sürücülük testləri 1 (şərhlərlə) – Yol hərəkəti qaydaları

"Məhdudiyyətli görünmə" duman, yağış, qar və digər şəraitlərdə, habelə toranlıqda yolun 300 metrdən az məsafədə görünməsidir (m. 1.42) Məhdudiyyətli görünmə yolun və ərazinin forması, quruluşu və həndəsi göstəriciləri ilə təyin edilmir.

1.5 "Tramvay xətti ilə kəsişmə" nişanı yolayrıcılardan kənarda, hərəkət hissəsinin tramvay xətti ilə kəsişdiyi yerə yaxınlaşma barədə məlumat verir. Bu nişan yaşayış məntəqəsindən kənarda təhlükəli sahəyə 150-300 metr, yaşayış məntəqəsində isə 50-100 metr qalmış quraşdırıla bilər (m.62.III). Tramvay xətti ilə kəsişmə yerinə yaxınlaşan sürücü tramvaya yol verməyə hazır olmalıdır (m.48.III, m.76, m.77).

4.1.1 "Düzünə hərəkət" nişanı bu yolayrıcından yalnız düz istiqamətdə hərəkəti davam etdirməyə icazə verir.

Vərəsəlik üzrə alınan NV-nin qeydiyyatı istisna olmaqla, digər hallarda NV 18 yaşına çatmış fiziki şəxslərin adına qeydiyyata alınır (m.27.IV).

Bu şəraitdə siz üstünlüyə maliksiniz və hərəkəti davam edə bilərsiniz. Belə ki, yalnız göy və ya qırmızı sayrışan işıq və xüsusi səs siqnalı ilə işarə verən operativ NV-nin sürücüsü yol hərəkətinin digər iştirakçılarına qarşı üstün keçid hüququna malikdir (m.74.II)

Sürücü öz sənədlərini (şəxsiyyət vəsiqəsini, sürücülük vəsiqəsini, NV-nin sənədlərini, daşınan yüklərə aid sənədləri) yalnız polis əməkdaşının tələbi ilə yoxlamaq üçün ona təqdim etməli və zəruri olduqda həmin əməkdaşın tələbi ilə NV-dən çıxmalıdır (m.37.I).

4.3 "Dairəvi hərəkət" nişanı bildirir ki, bu yolayrıcıda hərəkət nişanda olan oxlar istiqamətində təşkil olunub. NV sağa dönərkən hərəkət hissəsinin mümkün qədər sağ kənarına yaxın hərəkət etməlidir (m.42.VII). Ona görə də siz dairəyə A trayektoriyası üzrə daxil ola, lazım gəldikdə sonradan dairənin ikinci zolağına yerdəyişmə edə bilərsiniz.

Yola giriş yerində sürətləndirmə zolağı olduqda sürücü həmin zolaqla getməli və bu yolla gedən NV-yə yol verdikdən sonra qonşu zolağa keçməlidir (m.42.XI). Bu şəraitdə minik avtomobilinin sürücüsü yol verməlidir.

Qaydalara görə bu yolda hər hərəkət istiqaməti üçün bir hərəkət zolağı vardır. Hərəkət zolağı- eni avtomobillərin bir sırada hərəkəti üçün kifayət edən hər hansı uzununa zolaqdır (m.1.15). Yanqoşqusuz motosikletlərin qabarit ölçüləri və onlar arasındakı təhlükəsizlik intervalını nəzərə alaraq, onların bir zolaqda, iki sırada hərəkətinə icazə verilir.

Nizamlanmayan yolayrıcılarda baş yol olmayan yolla hərəkət etdikdə ötmə qadağandır (m.51.V). Minik avtomobilinin sürücüsü qarşıdakı (2.3.1 "İkinci dərəcəli yolla kəsişmə") nizamlanmayan yolayrıcıya baş yolla yaxınlaşdığından və yolun eyni istiqamətdə iki hərəkət zolağı olduğundan, o, hr iki yük avtomobilini ötə bilər (m.1.39; m.51.III). Deməli, A və B trayektoriyalarının hər biri ilə ötmək olar.

Qaydalara görə tramvay yollarında, habelə onların bilavasitə yaxınlığında, tramvayın hərəkətinə maneə yaranarsa, dayanmaq qadağandır. Bu şəraitdə minik avtomobili birtərəfli yolun (5.5 "Birtərəfli yol" nişanı) hərəkət hissəsinin sağ tərəfində qaydalara riayət etməklə dayanır və o, tramvayın hərəkəti üçün maneə yaratmır. Lakin dayanacaq meydançasına, meydança olmadıqda isə ümumi istifadədə olan NV-nin dayanacaq yerini işarə edən 5.12 və ya 5.13 yol nişanlarına 15 metrdən az yaxınlıqda dayanmaq qadağandır (m.52.IV). Bu səbəbdən də şəkildə göstərilən yerdə avtomobilin dayanmasına icazə verilmir.

Dayanacaq meydançasına, meydança olmadıqda isə ümumi istifadədə olan NV-nin dayanacaq yerini işarə edən 5.12 və ya 5.13 yol nişanlarına 15 metrdən az yaxınlıqda dayanmaq qadağandır (m.52.IV). Minik avtomobili ilə ümumi istifadədə olan NV-nin dayanacaq yerini işarə edən 5.12 nişanı arasındakı məsafə 15 metr olduğundan bu yerdə durmağa icazə verilir.

"Müəyyən istiqamət üzrə hərəkət" siqnalı nizamlayıcının sol və sağ tərəfindən gələn relssiz NV-nin düzünə və sağa hərəkət etməsinə icazə verir (m.58.II). Bu şəraitdə siz nizamlayıcının sağ tərəfindən yaxınlaşdığınızdan hərəkəti sağa davam etdirə bilərsiniz. Lakin sağa döndüyünüz zaman dönəcəyiniz yolun hərəkət hissəsini keşməkdə olan piyadalara yol verməlisiniz (m.75.I).

Yol nişanları ilə hərəkət üstünlüyü müəyyən edilməmişdirsə, dairəvi hərəkət təşkil olunmuş yolayrıcıya daxil olan sürücü dairədə hərəkət edən NV-yə yol verməlidir (m.42.XV)

Bu şəraitdə siz eyni əhəmiyyətli olmayan yolların kəsişdiyi nizamlanmayan yolayrıcıya, ikinci dərəcəli yola daxil olursunuz (2.4 "Yol verin" və 7.13 "Baş yolun istiqaməti" nişanları). Avtobus və minik avtomobili isə bu yolayrıcıya baş yolla yaxınlaşır. Eyni əhəmiyyətli olmayan yolların kəsişdiyi yolayrıcıda ikinci dərəcəli yolla hərəkət edən NV-nin sürücüsü, sonrakı hərəkət istiqamətindən asılı olmayaraq, baş yolla yolayrıcıya yaxınlaşan NV-yə yol verməlidir (m.77.I). Ona görə də siz baş yolda olan hər iki NV-yə yol verməlisiniz.

Keçiddən hərəkət qadağan olunan hallarda sürücü stop-xəttin, 2.5 "Dayanmadan keçmək qadağandır" nişanının və ya svetoforun yanında, bunlar olmadıqda, şlaqbauma azı 5 metr qalmış, şlaqbaum olmadıqda isə birinci relsə 10 metr qalmış dayanmalıdır (m.44.IV). Bu halda siz nişanın yanında dayanmalı, (1.3.2 "Çoxxətli dəmiryol nişanı"-nın olmasını və m.44.II-də göstərilən qaydaları nəzərə alaraq) yaxınlaşan digər qatarların olmadığını yəqin etdikdən sonra dəmiryol keçidini keçməlisiniz.

NV nizamlanmayan piyada keçidinin qarşısında dayanmış və ya sürətini azaltmışsa, qonşu zolaqlarda hərəkət edən digər NV-nin sürücüləri yalnız dayanmış NV-nin qarşısında piyadaların olmadığını yəqin etdikdən sonra hərəkəti davam etdirə bilər (m.54.II)

Sürücünün təhlükəni gördüyü andan NV-nin tam dayanana kimi qət etdiyi məsafə dayanma yolu adlanır. Dayanma yolu həmişə tormoz yolundan uzun (çox) olur. Belə ki, sürücünün reaksiya müddətindən və tormoz sisteminin effektliyindən asılı olaraq, avtomobil müəyyən məsafəni qət edə bilər.

Tünd qırmızı rəngdə olub yavaş axması ilə xarakterizə olunan venoz qanaxmanı dayandırmaq üçün yaranın üstünə sıxıcı sarğı bağlamaq lazımdır. Sarğının aşağı hissəsi qanla dolduqda, sarğı dəyişdirilmədən onun üstünə yeni sarğı qatları bağlanmalıdır.

XM-nin 327.2-ci maddəsinə əsasən svetofor və ya nizamlayıcının qadağanedici işarəsinin tələbini yerinə yetirməməklə törətdikləri qayda pozuntularına görə sürücülər cərimə olunur və 3 balla qiymətləndirilirlər.